Estaminet, cabareu ? : (Parlons Picard – Aisne Nouvelle du 20 Juin)

estaminetDe profundis ! quo core éd pus qu’en va povoér intérrer dins nos villaches ?

 

Chés églisses, tempes is ont quasi frémé feute éd tchuré, éd pasteur ; chés bouqueries is ont vu leus avant-toute érployés por tojours ; marquants d’couleurs, reugratchiers, coéffeux, marichats, is ont frémé leus griles, leus huches, leus contervints ; pus d’lat dins chés cinses coeuse, pus éd vaques ; pus d’marquands éd lédjeumes, éd galettes, pis darnier dsur élle lisse, pus d’clercs o d’maristers : en érgroupe, en rintabilisse. Ah seur ! flouritent chés communeutés éd commeunes, dés trottoérs, du fleurissemint, dés gan-nes pis dés blus sas por barocher papiis, boutelles pis boêtes, dés zon-nes écolomiques… !
Mains passe-tout-toute, pus d’éstaminet o ouberche. Asseuré, en y bot, pos chi tant qu’en n’crot, mains en sait-ti tout ch’contaque human qu’i n’a éddins ? Gins vien-ntent quér éch jornal por leu viux voésin ; nouvielles don-née d’élle sainté d’ein tel ; écanges éd poérets à érpiquer, d’us à couver ; infin iu éd rinconte, i n’a pus qu’échti-chi ; iu éd tchulture itou, en y édvise meume quitefos picard. En put core dire iu chitoéyin, d’où qu’ch’és gins qui n’ont pos él meume avisse, is

écangent ; iu d’où qu’en ébeuche meume dés lisses por chés érlections. Ech darnier iu éd rinconte cha va ête éch l’hayure audzeur élquélle en passera sin cabut por dire tros mots à sin voésin.
Quée vie qu’en vit ! Chés gramères is disaint conme cha : »Nos voérons toute !  », en n’a pos core toute vu, mains en est dsur éch cmin : él jur d’où qu’en n’voéra pus person-ne, à part li-meume, au matan, quinte en gratte ésse couen-ne aveuc sin raso édvant sin miro. 
   

GLOSSAIRE
Avant-toute : Auvent
Barocher : Collecter
Cabut : Tête
Cinse : Ferme
Clerc- marister : Instituteur
Édviser : Parler
Gan-ne : Jaune
Miro : Glace
Passe-tout-toute : Bouquet (le)
Raso : Rasoir

This entry was posted in Articles et textes. Bookmark the permalink.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>