Cachoère

In arringint ein-ne intervinchion dsur Sint-Nicolas, en s’disot, l’eute jur équ cha serot dés miux d’avoèr ein-ne cachoère por échti qu’i l’est toudis dins l’ombe éd Nicolas : ch’Père-cachoère. Alorse en s’a mis à cacher ein-ne cachoère, in s’disant équ dins chés cinses éd par ichi i ‘n’airot core bin ein-ne, ahoquée dins ein-ne vielle étchurie, aveuc dés coiïers éd gveux, dés couvertes, quites musettes, quaîn-nes et pis core nos cachoire, bernique ! Chés cinsiers qu’en yeus a édmindée, is ‘n’avint pus ; portant cha fasot partie d’éch l’atrinquillache d’éch varlet, quinte i partot dins chés camps, infiquée dsur éch coiïer d’éch gveu porteux, qu’éch cachuron qu’i n’avot au d’but i fasot claquer (en a du passier por dés éluminiés !). Ch’est conme chés sérinques qu’en don-not dés lavemints à chés gveux, chés jurs-chi en nos n’a értapée ein-ne qu’alle étot démanchée. En porra s’in seurvir dins chés jux tradichionnels picards, quinte él quatorze éd juïet, en bindot chés zius à quitezein pis i faulot qu’i l’étoinche ein-ne candelle allémée dins ein-ne boête cleuée dsur ein potieu. Souvint chés gins alintour is étaint noéyés, pis l’candelle a n’étot pos souvint détointe. Pusqu’en est dins chés gveux, tout l’mon-ne i n’connot pététe pos éch ju éd fiers à, gveux, d’où qu’i faulot, aveuc dés viux fiers usiés, lés éjeter por rintourer ein piquet d’fier qu’en avot intiqué dins l’tierre. Chés coïers éd gveux eusses, is ont souvint té montés in rintourache éd glache qu’en povot és mirer éddins. Ch’est dés coses du timps passié qui servtent core achteure, mains i n’a éch l’impalpabe, conme éch brut d’chés coeups d’pieds dins chés bas-flancs d’étchurie, él brut d’chés gveux qu’is boêtent dins ch’flot, échti d’leus pas dsur chés pavés qu’cha fasot souvint dés étinchelles (l’peu qu’is euchaint té ferrer à glache !), chti d’éch sintimint d’élle corne azie quinte en zés ferrot, d’chti d’leu hin-nichemint quinte is s’appelaint l’ein l’eute ; pis leu nom, pache qu’is avaint caquun él leur : Bijou, Gamin, Brillant… Cha, ch’est dins l’tiête éd cheutes
qu’is lés ont aouis, sintus. Élle civilisation d’éch gveu ch’étot quitecose pis chés varlets, ch’étot quitezeins !  »Proute à proute à min bidet… », qu’en fasot canter, pis fare à chés tchots…

GLOSSAIRE
cachoère : fouet
Père-cachoère : Père fouettard
cacher : chercher
ahoquer : accrocher
coiïer : collier
couverte : couverture
musette : sacoche
quaîn-ne : chaîne
atrinquillache : attirail
varlet : laboureur
infiquer : engager
éluminié : fantasque
sérinque : clystère
intiquer : enfoncer
azi : brûlé
hin-nichemint : hennissement
aouir : entendre
cachuron :cordonnet

This entry was posted in Articles et textes. Bookmark the permalink.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>