Cheutes éd Neuël

creche

I n’a granmint éd gins alintour d’éch mot-làl : Neuël ! I n’a dés tchots-noms : Marie, Joseuph, Hérote, Mélchior, Gaspar, Baltazar, i né n’a dés tout vnant : berquiers, ros maches, bu, bourrique, inchins, dés événemints : ch’l’ércinsemint, élle tisagne, dés payis : Bethléem, Égype, Judée, Nazareth.

Pis ein-ne histoère, infin au moinse quate histoères : cheutes d’édvant, éd la Bibe, is ditent qu’éch l’Invoéyé n’est pos core ilà, d’z’eutes qu’is ditent qu’ch’est él fius du Bon Diu, d’eutes qu’is crotent qu’i n’est qu’ein an-noncheux, pis d’eutes écore qu’cha n’a té qu’ein honme ! Alorse, voéyez qu’éch l’affare, alle est complitchée ! Adon,  n’a éch l’histoère érligieusse éd Neuël, pis chelle d’élle fâte éd famile, d’amitchié, éd chés éfants, dins l’fan d’l’énée. Chin qui compte ch’est pététe équ lés eins pis lés eutes is s’értreuvent por dire qu’ch’est ein bieu jour, qu’en s’értreuve insian-ne, qu’en mettra chés éfants au  mitan, qu’en pinse itou à chés eutes, qu’en… qu’en… (conme is ditent chés kénards qu’is vont avoèr coeud à leu foée à ch’momint-chi !). En va don s’értreuver dsur d’eutes mots : co-d’godinieux, blainc boudin, huîtes, bûque au chucolat, margret éd kénards, chucolats et pis core… En va minger, boère ein coeup, don-ner chés présints, en cminchant par chés tchots (dés fos en porra n’in don-ner itou à d’z’éfants qu’is ’n’ont pos !). Pinsons écore à fare singne à quitezein in-part-li, dins nos rintourache. Soégnons chés tchots moénets qu’is ont fam  pis so… Dins nos acats, pinsons à acater dés affares picardes. Et pis, héreusemint, chés courts jours ch’est la fin : chés jours is vont raugminter du seut d’ein-ne puche à Luche, d’éch pasd’ein sergint à l’An, à chés Ros en s’éne aperchot. Ein-ne énée alle s’in va, ein-ne eute alle s’in vient, définichons bin chelle-chi ! Cinchons bin l’eute ! Dés becs à chés tchots-tchottes, pis meume à ch’grind-père barbu qu’i va passier dins nos cminées qu’en aira yeu soin éd fare ramon-ner, bin seur !

GLOSSAIRE :
tout vnant : communs      inchins : encens
tisagne : circoncision         Invoéyé : Messie
an-noncheux : prophète   foée : foie
co-d’godinieux : dinde      singne : signe
in-part-li : seul                    rintourache : proximité
acat : achat                         puche : puce
Luche : Lucie ou Luce
A chés Ros : aux rois

This entry was posted in Articles et textes. Bookmark the permalink.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>