15 sept 2007

Élle confiture cha débouzine
Cha coeule coeule édsur sés mans
Cha passe par chés treus d’élle tartine
Porquo qu’i n’a dés treus dins ch’pan ?

Bin seur en put aveuc du burre
Chés treus en put bin zés boucher
Cha n’sert à rin pis vlà qu’achteure
Qu’cha coeule itou dsur chés côtiés

Feudrot bin surquer ésse tartine
Élle tien-ne droète justémint
En l’met in douche alle s’incligne
Cha coeule et pis en n’y put rin

Pis cha vos coeule dins vos manche
Pis cha vos coeurt dsur vos borgeron
Édpis vos coeude jusqu’à vos panche
Quinte cha n’bérlafe pos ch’patalon

Pis quinte cha n’coeule pos cha quét
Éch pan s’démiaute inter vos dogts
Cha griboule et pis cha érquet
Côtié d’élle farche cha y va drot

Au momint éd passier ein-ne loque
En in met ploein sés habillures
Pus qu’en l’ressuie pus qu’en berloque
Pis pus qu’en frotte pus qu’cha s’étind

Ch’est por cha qu’i n’a qu’is ont quér
Minger d’élle creume éd marron
Cha colle à ch’pan ch’est sins mystère
Ch’est pus conmun mains cha tchient bon

Porquo torner rond d’élle matchière ?
En fat l’éschole buchon-nière
In érvnant en prind ch’l'éscabelle
Pis en va tut drot à ch’l'ourmelle

Qu’alle seuche à fraisse o à l’rhubarpe
En l’inton-nérot bin à l’louche
Élle confiture en l’dégarouche
En in fat quér mitan d’ésse barpe

Pis ein jur en est à plache
En moène élle vie conme d’ein câtieu
Dins chés vasions dins chés palaches
En vos l’apporte dsur ein platieu

Élle confiture qu’alle débouzine
Qu’alle coeule coeule inter sés dux mans
Qu’alle passe pa chés treus d’élle tartine
Porquo qu’i n’a dés treus dins ch’pan ?

Bin seur qu’en put aveuc du burre
Chés treus en put bin zés boucher
Cha n’sert à rin qu’élle avinture
En n’va quind meume pos ércmincher ! !

[top]
About the Author


Leave a Reply

Spam Protection by WP-SpamFree