Fare l’éüt (PARLONS PICARD Aisne-Nouvelle du 13 juillet)

Dins l’Sonme is ditent moés-d’eut. Achteure ch’est l’affare éd quites jurs, en bat meume par nut, in ayaint cminché édvant-midi, quinte élle rousée alle a té cauffée au solel. Ch’est dés largueurs pos possibes qu’en feuque, qu’en bat, pis dés fos qu’en imballe par drière.

moissonneuse-batteuse En est lon d’élle moésson d’édvant, en n’parléra pos éd chelle à l’feuque quinte élle gadrème alle chuivot ch’feuqueux por loéyer chés guérbées, écore moinse à l’feuchille, mains d’chelle à l’moésson-neusse-loéyeuse. Souvint dux gveux, élle feuqueuse aveuc ch’moéneux d’gveus assis dsur ésse maquin-ne. Cha feuquot, cha loéyot.
En chuivot, nus-eutes chés ramasseux par drière, en rassian-not chés guérbes pis en fasot ein tas éd bottelées étampies aveuc ein-ne audzeur conme couvère o paraplue. Chés panmes in heut, bin seur ! I pluvot-i pindaint ein bon momint, en démontot chés dizieux por n’in fare dés cavaïers, dés quaîn-nes : dux guerbes bouque à bouque dsur ein rang éd chinq bottelées. Apreus cha i faulot quérrier, dins dés quérs, forchémint, aveuc dés ridelles.
Ch’étot toute ein-ne adrèche éd monter éch quér por pos qu’i n’cuélbute d’éch prumier tombercheut obin qu’i s’aniche dsus l’coutié dins ein-ne raque. Ch’étot itou toute ein-ne scïinche éd brêler éch combe qu’i tiendrot él toute. Dins l’cinse, chés gveus is sutent, éch varlet i raque outant qu’i

maquion-ne ésse chique ; ch’éttlée alle rinte par élle grin-ne-porte d’élle grainche.
Achteure i va falloèr fourquer aveuc ein-ne fourquière à dux dints. En éjette dsur élle cayelle, ein eute i l’éjette pus heut. Quinte élle darnière voéture alle a té rintrée, chelle aveuc éch boutchet, en fat éch l’érpas, por fâter cha, en a bin yeu du mérite. En attindra quites mos por batte au fieu o alle batterie, en est ércran !

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>