Hynme por La Picardie

france-picardie-2600bEn posot l’eute jure élle tchestion : Y n’a-ti ein hynme éd Picardie ? Ch’étot quitezein du Nord, i disot : Nus-eutes en a Min tchot Quinquin, pis vus ?

Ch’est seur, qu’en y ravisant éd pus preus, en s’rind compte équ chi qu’i n’a ein hynme uropéen : Quinte tus chés cmins du Mon-ne is canteront élle liberté… » ; qu’nos ons ein cant nachion-nal, élle Marseillaise… Ons-nus ein-ne canchon picarde région-nale conme chés Bertons is n’n'ont aveuc Bro Goz ma Zadoù – Viux payis éd més tayons ; obin la Provinche aveuc Coupo Santo – Coupe sinte, o core nos voésins Wallons aveuc Li tchant dès Walons – le chant des Wallons ? O core Ma normandie ? Portant dés canchons picardes, i né n’a pos lon éd 5 000, déteutées pa Philippe Boulfro, mains ein-ne équ tut l’mon-ne i sairot ! ? Ch’est vrai équ chés viles is ont souvint lés leurs, béyez Sint-Quintin aveuc Chés tros files, chés canchons éd carilion, Por fare in bon picard, Sint-Quintin min patelin, L’canchon d’Hérbert… Meume chés villaches is né n’ont : Bellinglise bielle église, O gai gai gai nos sons d’Etreillers, Ch’corbieu d’Hombières… Ouais mains por la Picardie ? en porrot prin-ne ein-ne canchon éd cabotan, Ouais ch’est mi Lafleur obin Elle cathédrale d’Anmiens cha, cha fat d’troup Sonme ! Ej cros qu’i né n’a équ tros qu’is porraint d’aller : Révillez-vus Picards pis Bordjignons, ch’est

pététe vrai qu’i feudrot équ la Picardie pis chés Picard(e)s is s’révilechaint (ein-ne miette éd troup djerrier ?) Rache picarde, équ Diu étte warde (éd troup patriote pis érligieux ? en l’apprindot portant dins dés éscholes, ch’étot i n’a longtimps, ch’est seur) et pis j’éme sus ramintue d’ein tchot live dsur Chés Roses éd Picardie, qu’cha a té composié par ein Inglais, Wood por élle zizique, paroles éd Weatherly, tradut par D’amor, en y édvise d’élle djerre 14, d’ein-ne bielle jon-ne fenme, d’ein offichier Inglais – ch’est-ti éd troup à ieu éd rose (humour picard !). Chés tros is n’sont pos simpes à canter ! Pis cha serot pététe él momint équ tertous en ravise quées canchons éd Picardie qu’en con-not, pis i n’airot-ti ein-ne qu’alle méritrot d’ête nos canchon région-nale ?

GLOSSAIRE :
quinquin : mot passe tout-partout
cmin : chemin
tayon : bisaïeul
sairot : saurait
cabotan : marionnette
Bordjignon : Bourguignon djerrier : guerrier
édviser : parler

This entry was posted in Articles et textes. Bookmark the permalink.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>