L’Aisne Nouvelle : Article : PARLONS PICARD – Quér ! chinq fos quér !

 

PARLONS PICARD / Quér ! chinq fos quér !

Jean-Pierre Semblat, notre chroniqueur picard.

I n’a conme cha dés mots qui font l’darnière-heure : i n’a élle rupture, l’értraite, élle crisse, élle ridgeur mains itou édpis ein momint él care conme is ditent itou chés Inglais ! Bin nus-eutes, en con-not surtoute quér.
Cha put ête ein veurbe, chi qu’éj dis à quitezein qu’j'él l’ai quér (te quiero in espagnol !), alorse éj tchiens à li, ch’est éme bon-ne anmie, éme méquain-ne par ézimpe.
Ej sus-ti por acater ein-ne neuve voéture, alorse chés carrettes allémin-nes is m’sian-neront rudemint quéres.
Quinte éj m’in vas récouer chés us équ chés glain-nes is ont pondus, éj m’in vas zés quér, pis i n’fut pos qu’éj lés fache quér.
Min tchot-fius i va à l’éschole, i l’est chinq heures, aïte aïte, i feut qu’éj voiche él quér. Cha va bétôt ête l’momint d’élle moésson, d’éch moés-d’éüt, dins l’timps en allot quér chés guerbes aveuc dés quérs à réheuches pis qu’en yeu serrot éch combe por pos qu’chés bottelées is n’quéchaint. Vlà dins la lan-ne picarde chés chinq quér : ein nom, éch quér por rintrer

chés récouaches ; ein abjetif quér, quinte cha vut bécoeup d’argint, pis tros veurbes : aller quér quitecose o quitezein, fare quér à terre, quér aveuc éch euxiliaire avoér, quinte en ainme. In frainchais, en dirot équ ch’est dés homophon-nes (qu’en lit parellemint) o meume itou dés homographes (qu’en décrit parel). Apreus cha chi vos volez avoér care éd quitezein, soégnez-él-lé conme i feut !
Alorse qu’i né n’a qu’is découvértent él care, nus-eutes cha fat dés énées qu’él quér, éj diros meume pus, chés quér en zés con-not.
Chés grinds ésprits is s’rincontraint-ti don ?
Eute cose, pinsons à chés jux tradichion-nels picards por chés jux qu’en plache dsur chés plaches por él quatorze éd juïet : guernoulle, billon, tir-au-lapan, o bilout, candelle à l’seringue à lavemint, jux éd chabots, cisieux et pis core…

Haut de page

Article paru le : 12 juillet 2010

L’Aisne Nouvelle : Article : PARLONS PICARD – Quér ! chinq fos quér !

This entry was posted in Articles et textes. Bookmark the permalink.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>