L’Aisne Nouvelle : Article : PARLONS PICARD – Rincontes

 

PARLONS PICARD / Rincontes

Jean-Pierre Semblat, notre chroniqueur picard.

Conme alle dit ein-ne fenme qu’éj con-nos bin : « Dins la vie, i n’a pos d’hasard, i n’a équ dés rincontes ! ». Vos m’direz équ ouais, seulemint i feut quind meume sourtir d’ésse mason ! Ah bin cha, bin seur ! Rinconte à s’n'ouvrache, pététe pos bécoeup obin alorse, ch’est qu’en est li-meume nouvieu, obin qu’i n’arrife quitezein éd neu. Bin seuremint qu’chés pus bielles rincontes ch’est quinte en s’in va quite part : voéyache, vaganches, déplachemint por ein-ne achuchon. Vos êtes dins ch’troain, dins ein aréoplan-ne, ein-ne réunion… Quitezein i l’est assis à côtié d’vus-eutes, vos li dmindez quite cose : qui qu’ch’est qu’i l’est, d’où qu’ch’est qu’i va. Vos li émindez sin jornal, li proposiez ein chuque, li édminder l’heure obin ch’décalache. Et pis cha y est, cha cminche. I dit qu’i s’in va vire sin tchot-fius qu’i vient éd vnir au mon-ne. Alle s’in va érquére élle carrette qu’is ont prêtiée à leu file. Is s’in vont acater ein orque éd barbarie qu’is ont écmindé por leu groupe. Grind-père i vient d’moérir, ch’étot quitezein ! is vont à l’interremint. Obin ch’est ch’live équ vos voésin i lit, justemint vos vnez itou d’él lire obin d’él l’acater. Ch’est ein jon-nieu qu’i s’in va

passier ein mos in Inglétierre por qu’és n’inglais i voéche émiux. Elle fenme alle a troés éfants conme vus, dux fius pis ein-ne file parel, ch’pus viux ch’est Camile conme à vos mason. En s’écange ésse n’adrèche, sin liméro éd téléphon-ne, en s’amoutre ein portrait d’chés tchots. Et pis vlà, éch voéyache i s’définit, en s’érvot à érprin-ne chés valises, en prind dés fos él meume taxi. Et pis en s’érvoéra-ti ? en s’don-nera-ti dés nouvielles, ein coeup, dux coeups ? Ein-ne dsur chint éd chés rincontes-làlles alle aira vraimint d’élle chuite ! Esses eutes ch’aira té ein momint éd caleur humain-ne. Ech voéyache nos a sian-né pus court. L’inginche humain-ne nos a sian-né meillieure. A quind chu élle prochain-ne rinconte ? Aveuc qu’est-che ? Là où est-che ?

GLOSSAIRE
quitezein : personne de valeur
quite part : quelque part
quite cose : quelque chose
sian-ner : sembler
qu’est-che : qui
inginche : espèce
jon-nieu : ado
là où est-che :

parlonspicard

Article paru le : 5 juillet 2010

L’Aisne Nouvelle : Article : PARLONS PICARD – Rincontes

This entry was posted in Articles et textes. Bookmark the permalink.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>