Leus dicchion-naires pis nos lifamotes

Quinte en ouvère él Tchot-Robert, en treuve qu’i n’a ploein éd mouts qui nos vien-ntent du picard : boulanger, caillou, rescapé, rémoulade, oyat, flaque, fabliau, cloque…, pis core bécoeup d’eutes.
Él Larousse éd l’Inchien frainchais, i n’est parellemint ploein : tesson, toudis, gave, cair, craon… Ch’est tut conme éch Larousse d’achteure : canevas, cauchemar, étalon, marquer, pouliche. Cha put nos don-ner dés idées, en n’put-ti pos fare sin prope glossaire à li, in picard à pus forte coeuse. En put dés fos s’y matte à pus d’ein, obin core rélver chés expressions d’sin grind-père obin d’ésse gramère qu’is parlaint o parltent écore picard (o patos, bécoeup éd gins ésses s’servent d’éch mot-làl : patos !). Chi qu’is avaint ein métchier qu’i n’ézisse pus, conme varlet, lancheux, marichat, berquier, gorier et pis core. Sin grind-père i l’a té varlet ! alorse, ch’est dés : gveu, éttlées, porteux, dzous-vergue, jornieu, coffin… I l’a té marichat, ch’est dés inclème, martieu, fu, traval,  »marichat bat l’martieu, courtées fesses pis long boéyeu » ; s’gra-mère alle étot-ti laveusse, vlà du noér savelon obin verd, planque, brouche éd quien-poéls, cuvelée, sieu, trimper, tirer d’ieue… I l’étot-ti clerc o marister : rintrée, buselle, tableu, plèmes, biles, préeu… ; sache-fenme : berche, langeron, boudain-ne, püinte, ieu coeude,
tète… bocquillon : caignie, équette, baru, abatte, picavet, laches…
Souvint meume, quinte en est ein-ne miette conserveux, ch’est dés coses qu’is nos vien-ntent d’eusses eutes par générachion qu’is sont évnues édvant nus, pis qu’en warde dins ein bâtimint, dins sin guernier : ein-ne galétchière à ponmes-ét-tierre, ein-ne prussièn-ne por cauffer, ein cauffe-ieu à bos, ein-ne fourque à béttrafes, ein-ne mésure à lat, ein patin à bourbe, ein-ne passette à z’éscorbiles, ein ramon d’bouilleu.

GLOSSAIRE :
lifamote : glossaire / pus forte coeuse : a fortiori / varlet : laboureur / jornieu : journal (superficie) /quien-poéls : chiendent / craon : craie / tesson : blaireau / gave : gosier / toudis : toujours / boudain-ne : nombril / picavet : fagot / lache : collet / éscorbiles : scories / ramon : balai / tète : sein.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>