Paplars (Article dans l’Aisne Nouvelle, rubrique Parlons Picard)

In picard, i n’a tout chin qu’i n’a in frainchais : dés éspréchions, d’élle conjudjaison, dés sylon-nymes…, et pis itou des feux-anmis, qu’en lonme paplars ; is érsian-ntent à dés mots frainchais, mains is n’ont pos du tout él meume sins.
Por fare dins « l’humard pis cour » (ju éd mots !) en porrot prin-ne conme preume ézimpe ein-ne éspréchion jarteusse dins ein-ne histoère équ Georges Gry l’a té él prumier à conter : l’ein, Améritchain i dit « good luck » pis l’eute, feux-anmis picard forche, i comprind « goût éd loque » (qui pus est à loqueter !), cha fat ein-ne rude différinche !
Ainchi, en put don-ner quites ézimpes. I ‘s’a « affolé » ésse ganme, pis conme i n’élle l’a pos soégnée, cha ‘s’a « abouté ». Mi, j’vas l’«soégner » por vire éd d’où qu’i l’érvient. Pus qu’éj « cœurs », pus équ chés cœurs is raindon-ntent. Nos ons ésmé ein-ne « route » éd chicons. Dés viux vieux cha n’ézisse mie. « Sintimints » à la fan d’ein-ne lette, i veut miux dire équ ch’est dés bons sintimints !
« Ramon » cha n’est pos ein tchot-nom d’Espangne, cha balie. Mains drôlemint « ran » cha érsian-ne rudemint à ch’«ram » inglais. Por n’in définir : « Min cat i s’cauffe », cha n’est pos du russe, meume chi qu’en l’cante dsur ein air russe li. « Mi j’sais l’Inglais sins l’avoér appris » cha n’a érien à vire aveuc « It’s a long way to Tipperary », seuf éch l’air qu’en cante édsur.

 

  • GLOSSAIRE :
    Balïer : balayer
    Cœurs (éj) : cours (je)
    Jarteusse : humoristique
    Loqueter : laver le sol
    Ramon : balai
    Ran : bélier
    S’abouter : s’infecter
    S’affoler : se blesser
    Sintimint : odeur
    Soégner : surveiller
    Vieux : veaux
    Viux : vieux

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>