PARLONS PICARD / Courtées histoères o Gleuderies

Dins l’cour d’éch l’éschole ein tchot, in brayant dit à ch’clerc : «Mossieu, i n’a ein quien qui m’a mord ! » « du… mordu » qu’i dit éch clerc. « À min cul » qui répond éch tchot. Diffichile d’és comprin-ne quinte i né n’a ein qu’i l’est picard dins s’compérnette, frainchais dins sin parler pis l’eute picardophon-ne.
Pus ein-ne édvinette, chelle-làlle : ein cocassier i l’éyeuve itou dés berbis. I compte chés pattes pis chés zius d’chés biêtes qu’i l’a : 44 pattes pis 30 zius : Combin qu’i l’a-ti éd glain-nes ? combin d’berbis ?
I parot qu’ein pourcheu cha sairot compter, mains dux chiffes seulemint : « neuf, neuf, neuf ! » quinte en vient éd li don-ner à minger, pis qu’i l’est contint pis « huit huit huit ! ! ! » quinte éch bouchi i rinte dins s’porquerie aveuc sin sieu, ésse cassetrole, ésse mailloche pis sin coutieu.
Gleude i l’est sourd, pis ouvérier d’conmeune. Ch’mayeur i passe :
« Cha va-ti Gleude ? » « Ouais j’feuque ! » « Cha va conme i feut alorse ? » « Chi j’éne feuquos pos por vus, j’feuqueros bin por ein eute ! » Ch’est ein djaloque d’édmi-sourd !
Dudule, ésse fenme, Phrasie, a li a raccorchi ein-ne maron-ne ; mais fuche

qu’alle a copé d’troup d’tissu, fuche qu’alle a fat éch l’orlet d’troup largue, éch patalon Dudule ch’est conme ein bérmuda. Tutur qu’i l’rinconte à ch’l'ouberche i li dit : « T’as yeu ein fu d’planquer à t’maron-ne ? » « Nan, qu’i li répond Dudule, élle soupe éd Phrasie alle est tellement bon-ne, qu’i m’vient ein-ne duxiènme croéssinche ! »
Ch’est chin qu’i né n’a qu’is appelltent cha l’humard picour !

GLOSSAIRE

Braire :  pleurer
Cocassier : marchand
de volailles
Eyeuver :  : élever
Feuquer : faucher
Glain-ne : poule
Gleude : Claude
Gleuderies : histoires
drôles
Mailloche : maillet
Mayeur : maire
Ziu : œil

This entry was posted in Articles et textes. Bookmark the permalink.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>