PARLONS PICARD Flamique ! Quées flamiques

Édjà édpis él XVsièque éch mot flamique i l’est con-nu. Ein restaurint érlonmé pis étoélé (ein-ne tout d’meume !), dins la Sonme, i n’in porte-ti pos él meume nom. Échti qui fat dés flamiques ch’est ein flamiqueux pis chin qu’i fat, ch’est du flamicage. En put (bin équ récomparaison éne fuche pos forchémint raison) rapproucher flamique pis l’flammekueche éd chés Alsachiens, i n’a dés flanmes o core d’élle flanme ilà-ddins (ou sins prope pis fidjuré !)

Dés flamiques, n’in vux-tu, n’in vlà ! elle prumière, chelle d’à ch’momint-chi, ch’est bin seur élle flamique à poéréts (o core porions, porjons…). Dux fachons d’élle fare (o meume quate chi qu’en y ravise bin).
Élle pâte dux fachons : pâte feulletée (burre-margrarine o graisse- margrarine qu’en étale au peuche) obin pâte sablée. Éch l’éddins, dux conteninches : poéréts in part eusses eutes, sins érien in pus, seuf sé pis poève ; obin alorse poéréts aveuc seuce, lardrons et pis coère.
Chés flamiques, conme leu nom i l’dit, alles sont cuites à l’flanme éd chés picavets* par ézimpe. Cha yeu don-ne ein meilleux sintimint. Quinte en dit pâtichon-ner, en pinse tave, feulle, rouilleu, tortière, frain-ne, peuche… Aïte, aïte chés poérets is vont monter (i va n’avoér dés turons éddins), en dévra attin-ne l’énée qui vient por érfare à nouvieu d’élle flamique, pos dvant chés courts-jours 2009-2010.
Eutes flamiques : à paturon obin à chitroulle, flamique à z’oégnons, à chicons… In Quiérache, pis dins l’Avesnos, en pale éd flamique au marolles, meume chi, audzeur éd chelle-làlle, i n’a pos d’couvére ! ?
Chelles à ponmes pis à poéres éne pren-ntent pos él nom éd flamique, mains éd coeuchons, alles ont tout d’meume ein couvére audzeur.
Quo boère aveuc ? bière porquo pos ! blanc, seur ! chide chi fat (aveuc émsure bin seur !).

*Ch’est itou ein prope nom éd famile.

 

img transparente

img transparente

Article paru le 23 mars 2009 dans l”Aisne Nouvelle

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>