18 mar 2010

PARLONS PICARD / Quiérache

1 Comment

2894_1Quinte en y rinte, cha s’vot, pos tout in allant, nan mains quasimint d’ein seul coeup. Pos d’camp obin bécoeup moinse éd camps pis por n’in définir, dés pâtures, dés pâtures, et pis dés hayures forchémint por zés frémer, dés fos dés haisettes qu’en a érplinté sur l’bourdure d’élle rute. Mitan d’cha i n’a dés ponmiers, queuts à terre, étampis, nouvieux quitefos, qui don-ntent dés ponmes au coutieu, du chide, d’élle goutte. Por porchuire éch tableu, dés vaques, noères pis blanques d’ein côtié, blanques pis noères éd l’eute, o core bleuses du Nord, dés vieux, dés jniches.
Dés toérs en n’in vot mie pus, édpis él timps qu’is sont dins chés busettes. Cha, cha don-ne : éch bos por éch cauffache, ch’est chés hayes – éch chide pis chés ponmes pis l’goutte por chés frutchiers – éch lat, élle creume, burre pis formache (éd marolles forchémint) por chés vaques, pis d’élle vian-ne ! I n’a itou achteure dés berbis, à coeuse qu’éch lat i n’norrit pus és n’honme et pis chés gveus éd La Capelle. Tiens ein nom éd iu picard (obin quiérachien chi vos éz pusse quér !) conme itou : Hirchon, La

Vaqueresse, Erloy…pis dés métchiers d’édvant, core d’achteure ? ! : hayeux, cinsier, teupier, mandier, chabotier…
Quinte en monte éd Quiérache, en rinte dins l’Avesnos, quinte en dévale éd l’Avesnos, en rinte in Quiérache : i n’a qu’éch liméro éd départemint qui cange, pis en n’él vot meume pus dsur chés carrettes édpis qu’en a inyeuvé éch liméro 02 pis 59. Mains conme ch’est él meume payis, él meume payisache, lés meumes gins, en dit l’Avesnos-Quiérache…

GLOSSAIRE
Au coutieu : à croquer
Bleuse du Nord : vache régionale
Busette : éprouvette
Carrette : voiture
Goutte : alcool de prune, de pomme
Hayeux : bûcheron de haies
Jniche : génisse
Mandier : vannier
Teupier : taupier
Toér : taureau-
Vieu : veau

[top]
About the Author


One Response to PARLONS PICARD / Quiérache
  1. Hier aunuit, y’avot ch’preume « Chabotade » à Buronton-les-Papinettes, dins ch’poéyi d’hayures, d’bure pi d’marolle. Einne sorte ed ducasse à chabot, qwo ! Bié seur, nous y ons canté l’canchon des chabotiers, aveuc un crincrin à manivelle ; j’y avot amné deux violon-chabots pou faire einne musique espéchiale… ; pi dzeutes instrumints, assurémint, pou foaire dincher des « gilles » dins leu bieu costume. C’fête làle, al éteut parrain.née pa troés fanmes : ein.ne toutiote ed six mois, ein.ne tiote ed six ans, pi ein.ne pu trop grande ratatatayon.ne ed… 103 ans ! Y avot du monde à minger, à acouter pi à vire des chabots, des chabots, pi core des chabots faits dins du bo d’abe ed… Thiérache !
    Chouo l’Mucheu


[top]
Leave a Reply

Spam Protection by WP-SpamFree