11 août 2010

Picardothérapie (si fat)

0 Comment

Tus chés mouts qu’is s’définitent pa -thérapie, cha vut dire équ quite part, en soégne chés gins. Sins vraimint zés soégner dés fos chin qu’en fat à chés gins, cha yeu fat du bien, cha yeu fat passier ein bon momint, cha yeu pale quinte en yeu pale. Eh bin, quinte en dit qu’en fat d’élle picardothérapie, ch’est ein-ne miette cha.

Vos m’direz putout aveuc dés viux gins, ouais, mains pos seulemint. Seur équ quinte en cante élle canchon-chi obin chelle-làlle, chés gins is font marcher leu mémoère, quinte is s’éfforchent éd vos comprin-ne, d’és fare itou eusses eutes comprin-ne, ch’est quite cose.
Dés iux, dés affares, dés gins qu’is ont con-nus, cha zés fat vive dés fos ein deuxiènme coeup quite cose qu’is ont vi. Cha n’est pos por cha qu’en est cérusien, mains en apporte quite s doucheurs o meume ein coeup éd chion à chés gins qui vos acoute. J’lisos l’eute jur dins ein dotchumint d’éch groupemint à la lan-ne frainchaise pis à chés lin-nes région-nales ein artique d’ein-ne cérusien-ne qu’alle disot conme cha qu’élle lan-ne berton-ne alle li seurvot por s’intértnir aveuc chés pinsion-naires d’mason d’értraite.
Quinte vos contez quite cose édvant dés gins, du tout vnant et bin, ch’est souvint parel ; j’diros meume miux, meume à dés tchots, quinte en édvise picard, cante ein-ne canchon dormoère, ein-ne seuteuse obin ein ju éd dogts, i n’a quite cose qui passe, meume chi qu’is n’ont pos intindu bécoeup éd picard dins leu tchotte vie.
Trachez ein-ne miette éd fare vos martché, vos conmichions

in picard, vos voérez équ chés gins is n’réagitent pos parel, qu’is sont pus amiteux, pus ouverts, moins pressiés.
Quinte en dit qu’él picard ch’est élle lan-ne d’aupreus, d’l'amitchié, d’chés métchiers, d’l'amusemint, d’élle caimpangne obin d’chés feubourgs. Itou qu’en touille quinte en marmiton-ne. Chelle d’chés gardiniers, d’chés biêtes. Chelle d’chés mouts dux. En nos dit-ti pos souvint : «Vos nos fasez pinsier à nos gramère, obin à ein viux nononcque. »


GLOSSAIRE
si fat : sic / tracher : essayer
d’aupreus : de proximité
viux gins : personnes âgées cérusien : médecin
coeup d’chion : regain d’énergie
marmiton-ner : cuisiner canchon dormoère : berceuse

[top]
About the Author


Leave a Reply

Spam Protection by WP-SpamFree