Quites coses

tapette_a_souris_lada_animal_3qdhygEn a tertous dés séquos qu’en y tient : monte, preume apparel à portraits qu’en nos a acatés et pis core ploein d’affares, mains, pététe chin qu’en y tient él pus, ch’est dés coses qu’en nos a don-nées, léguatées pis qu’chés don-neux is n’sont pus ichi, dés fos meume pus d’éch mon-ne-chi !

  Élle navette d’ein-ne vielle lancheuse, éch l’houlette obin éch paraplue éd quite berquier, pêqueux, ein live éd gardinage d’ein-ne vielle matante. Quite coutieu, éploingue à croate, pot à toubac. Ein briquet à amadou, élle chiflotte d’ein viux, gilliet éd cacheux, coupe-chu d’ein barbu : Coses inanimées ez-vus don ein-ne ânme… ? quinte en zés vot, quinte en zés prind, en pinse à chti-chi, à chelle-làlle qu’is ont apparténu, en zés vot, en lés intind core. Éd tut cha, en porrot fare ein-ne évintaire à l’Prévert : brique à treus por cauffer ch’lit, caquse d’élle djerre 14, compte pis cope-fils éd mulquinier, passette-à-z’éscorbiles, lance à bettrafes, baïon-nette, tire-plombs, bourselot, jornal éd nos naissainche, capieu, can-ne, blague à toubac ! Nus don quo qu’ch’est équ nos laisserons-ti ? I n’aira quind meume chin qu’nus eutes en ingrainge : cabotans, routelles, jux picards in bos, tapettes à séris, boutelle à genièfe, lives in picard, meules à cugnot et pis coére… Nus itou nos sérons dés légates por cheutes qui nos chuirons ! Pis n’oblions pos él Sint-Valintin!

 

GLOSSAIRE
Bourselot : pelote à épingles
Chiflotte : flûte
Coupe-chu : rasoir
Croate : cravate
Cugnot : cugnot 4 pattes de Saint-Quentin
Escorbiles : escarbilles
Evintaire : inventaire
Lancheuse : tisseuse
Mulquinier : tisseur de fins cotons
Séquo : chose

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>