Tchot-Jean

Ch’est dins chés habituanches éd chés Picards por délonmer ein honme, d’li don-ner du Tchot édvant sin tchot-nom o meume sin nom d’famile.

Cha put avoèr tros sins : chi qu’i n’est pos grind – chi qu’sin père i portot él meume tchot-nom équ li, o core ein nom amiteux. I n’a itou dés Tchots qu’is n’sont pos Jean, mains dés Tchot-Pierre, Tchot-Jules. En in con-not, en zés con-not, dés qu’is sont chés culots d’ein-ne grin-ne famile conme i né n’avot dins l’timps ! Qu’is ont yeu itou ein-ne forte famile. Is ont souvint fat dés métchiers pis dés plaches. Ch’est dés fidjures incontornabes dins ein villache : cha con-not ésse génésse éd tut l’mon-ne toute éoute ; cha don-ne la man à lés eins pis à lés eutes. Is sont gardiniers, élveux. Ro d’élle bérouette, moéneux éd gveu, câtreux éd lapans, danseux conme pos ein. Dés gins à tutes mans qu’is savtent feuquer, ésmer à l’volée… Et pis dés conteux d’histoères, pus incroéyabes lés ein-nes équ lés eutes, qu’alles font rire meume dés gins qu’is n’ritent équ quinte is s’brûltent. Quites proveurbes dins leu bouque, dés ditons éd leu père (qu’i l’airot té warde) obin d’leu grind-père – in édvisant éd quitezein qu’i n’a pos frémé ésse bistchière : « À l’mason d’ein honme mort, en put laissier éch l’huis ouvère ! » Chés Jean-làl ch’est

l’mémoère, l’huménité d’nos villaches. Souvint en rind honmache à chés gins quinte is n’sont pus ilà, por ein coeup fasons él-lé lés taindisse qu’en lés a core dzous la man. Éch l’abjectif-làl, tchot, i vut dire Grind ! N’zés cantons-nus pos itou dins chés canchons picardes conme « Ech l’érignie » obin dins « Tchot-Jean Israël pis s’casaque » o core « Tchot-Jean qui dinse dsur sin dogt ». Et pis dés Jean, cha n’est pos conme cheutes qu’is font él Jacques obin cheutes qu’is font él Gleude. Dins chés calindriers ch’est dés sints et pis is pren-ntent itou dins d’z'eutes lan-nes, d’eutes écrivaches : Yann berton, Yvan russe, Hans obin John…
En put proposier dés sujits éd chron-nique, dés érmarques, fuche dsur éch sissite d’l'Aisn-ne Nouvielle
GLOSSAIRE
Tchot-nom : prénom
Amiteux : affectueux
Culot : benjamin
Forte : nombreuse
Génésse : généalogie
Don-ne la man : aide
Câtreux : châtreur
Warde : garde
Huménité : humanité
Fare él jacques : faire
l’imbécile
Gleude : simple d’esprit
Ecrivaches :

formes

This entry was posted in Articles et textes. Bookmark the permalink.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

*

Vous pouvez utiliser ces balises et attributs HTML : <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>