Chespicards

En l’lonme itou éch battu, écore wâtieu picard. En n’don-nera pos ch’l'érchette, pache qu’i né n’a pos qu’ein-ne (caquun i l’arringe élle sien-ne !) ; en put quind meume dire qu’ch’est, l’pus souvint ein riche :

« Bécoeup d’burre, grainmint d’us, cha fat du boin wâtieu battu ! » Ech meule, éspéchial, i l’est meume capieu d’élle confreurie épon-nyme : pus heut, étrot qu’ein à galmiche. Ch’est putout ein-ne pâtichon-nerie éd prume-timps, forchémint, l’momint qu’chés glain-nes is pon-ntent él pus, amon ! En porrot quasimint dire équ ch’est ein wâtieu éd chélémon-nie (Pasques), conme cugnot, rond d’Sint-Nicolas, étrénnettes…, à d’eutes momints d’l'énée.

Ramintuverie d’éch boulinger d’É…, i n’in fasot qu’en appelot gâtieu d’éch boulinger (érchette éscrète) por élle ducasse : en i portot chés us, pis ch’est li qu’i pértrissot (en i inmoénot itou dés ribimbelles éd flans, posiés dsur chés contervints éd portes, i zés cuisot). Por chés érchettes, raviser dsur chés sissites, cha sérot bin l’diape équ vos n’treuvainchaint pos ein-ne érchette qu’alle vos irot. Bin seur éne pos écolomiser dsur éch pértrissage ; élle pâte alle est battue pis érbattue, pus équ cha éyeuve, cha gonfèle. Éne pos rimplir chés meules à coupet. Por éne pos s’étanquer tout à fat, ein-ne gatte éd chide obin éd poéré vos féra avaler conme dins l’canchon-ne : « Intiques, intasses, éne t’otchuppes pos d’échti qui passe ! »
GLOSSAIRE :

• à coupet : à ras bord
• amon : n’est-ce-pas
• ducasse : fête patronale
• échti : celui
• étanquer (s’):étouffer (s’)
• flan : tarte
• galmiche : brioche
• gatte : jatte
• intiquer : enfoncer
• ramintuverie : souvenanc