Etchus cochon-net plomb obin pièches

Ech nom i put lonmer : · éch carré rectague obin rond éd plomb-étan dsur élquel en éjette chés pièches · éch tchottain qu’en éjette in preume por povoér él couvér obin l’approchi ·chés étchus éd bronze, d’achier obin d’inosc qu’en fat achteure · pièches ch’est éch darni vocabe qu’en use. Por chés dux darniis, bin seur cha a quite cose à vir aveuc l’argint, argint qu’en gangnot dés fos in juant, obin argint qu’en n’dépinsiot pos por paiyer chés canons, chés gouttes o achteure chés édmis éd bière.

Bin seur, en féra él rapprochemint aveuc élle pétanque d’oc, aveuc chés différinches :
- nos ons dés bourles mains plates
- en a rétréchi éch terran au pus poussibe
- en jue éddins, raremint déhors.
- Ech plomb ch’est souvint à ch’l'éstaminet.
I n’a itou dés érsimblinches :
- en jue pa paires
- en a dux pièches à li (dux bourles dins l’pétanque)
- en put juer in 21 puints
- en értient chés puints dins s’tiête ( en n’lés marque pos dsur ein support).
- I n’a ein pointeux, i n’a ein tireu.
- En conselle, en mésure, en s’indjeule,…

D’quo qu’i feut ?
Plomb éd 40 x 40 cm éd coutié pis 8 mm d’épais 12 kg éd plomb pis 5 d’étan Etchus marquis éd fachon différinte conme audzeur 50 mm éd diamète pis 5 d’épais.

Régues
En tire aveuc ein-ne pièche por échti qui cminche ;
En jue in 15 o 21 puints : 2 paérties pis éch l’érvinche chi ébsoin.
Chés bons jueux is jutent dins chés cuins.
Chés patte-à-gueuche is sont souvint adrot.
Chi ch’tchot i seute in déhors en l’réjette au cminchemint d’élle paértie pos pus d’3 fos sins cha en l’met dins l’mitan obin ch’est l’eute étchippe qu’alle l’éjette.
Elle pièche dsur éch su cha fat 2 puints.
Chi qu’en vinvole éch tchot in juaint, en l’érmet dins l’mitan d’éch plomb.

Ech darnii cocours d’étchus équ j’a vu, cminchemint d’avri, à Bieuvos, in Vermindos, i n’avot 18 étchippes d’ingagées !

Ju(x) éd quiles


Quile bin seur in picard conme file, bile, mile, vile,
Au cminchemint, seuremint, conme por bécoeup éd jux
(éj pinse par ézimpe à ch’ju éd cagnouffe , en a jué
aveuc chin qu’en avot, du brut, dés rondins éd bous,
d’élle meume londjeur pététe pos, qu’en avot copé por
és cauffer dins l’hiver, pis in attindant, seuremint
aveuc ein grous cailleu, ein eute mourcheu éd bos
conme ein-ne borlette, o core ein-ne sourte éd
quile pus tchottain-ne pis fachon-née obin coére
ein-ne choque (o ein choquelet pus ou moinse arrondi),
en ravisot à fare quelbuter chés  » quiles « .
Conme por éch resse, dés bâtons, dés chifflottes,
en a volu yeu don-ner ein-ne fourme :

En avot bin seur dés quiles éd tutes lés fourmes,
tout ein fasot d’élle sourte équ sés quiles is
n’érsian-naint pos chelle éd sin voésin obin
d’éch villache voésin. En fasot itou dés quiles
pus tchottes por chés tchots.
El pus souvint, éch nombre éd quiles i l’étot impar :
ch’étot chinq, ch’étot sept, ch’étot neu.


Fourme éd ganme, fourme éd gins, pis pététe
coère pis, bin seur conme en fourmot chés quiles,
en a fourmé élle bourle, chés bourles.
Chi qu’en avot dés groches quiles, i faulot
dés groches bourles n’oblions pos équ quile
ch’est itou ganme pis équ boule ch’est itou tiête :
étot-ti tchestchion éd fare quér chés ganmes
à coeup éd tête obin éd rapprocher tiête pis ganmes ? ? ?
Por aidier à ch’plachemint éd chés quiles,
pis qu’alles tienchaint étampies dux moéyins :
ein soque pièrre bleuze obin ein soque padzous
chacun-ne éd chés quiles obin coère ein-ne bague
in bas d’élle quile, bague cleuée mains libe
ein-ne miette quind meume por povoér chuire élle tierre.
Ech marichat i l’étot souvint appélé à l’aidje
por chés bagues pis férrer chés bourles :
élle ferure éd chés bourles alle impêquot
équ chés bourles is n’éclatchaint tout d’chuite.
 
ECH GRIND JU
ECH TCHOT JU
Diminsions quiles Diminsions quiles
Heuteur 0,70 m Heuteur 0,30 m
Diamète 0,15 m Diamète 0,12 m
Pods 3 kg * Pods 1,5 kg *
Nombe 7 Nombe 9
Diminsions bourles
Diminsions bourles
Diamète H. F. E. Diamète 0,15m
Pods 5 kg* Pods 1,2 kg
Nombe 3 Nombe 6

*ferrées
H.F.E. Honme – Fenme – Efant (cha in dépind)

Jeu de Grenouille

Ju d’éddins, ju éd déhors, qu’en jue aveuc dés groches pièches
obin dés tchouts palets (attinchion, pos dés tchots poulets !) ;
en éjette éd dux à-pas (dux mètes).


Chuivant chés treus d’où qu’alles quètent,
chés pièches, en marque édpis 2 000 puints (élle djeule d’élle guernoulle)
djusqu’à 10 puints (treu tout simpe).

Souvint en a, lés eins pis lés eutes,
ein-ne démi-douzoain-ne éd pièches à éjeter.

Cha put és juer pa paires obin triplettes,
feut-ti, à ch’momint-làl qu’en euche d’assiez éd pièches !