21 déc 2011

PARLONS PICARD / L’union alle fat la forche | Aisne Nouvelle

0 Comment

Jean-Pierre Semblat est insatiable dès qu'il s'agit de parler picard.	(Photo : Gaël HERISSE)

Évnue élle meuvaise saison, en vot chés moénets qu’is s’érgrouptent. Équ cha fuche pos long d’chés masons, chés gris moénets és mattent in bain-nes : chés jon-nieux, mains itou chés pus viux, marles aveuc leus noérs guernons pis fémelles grisettes.

Tus lés jurs édvant qu’él solél i n’quéche (quinte i n’a du solél, bin seur !), en vot torniquer dés chintain-nes d’étornieux, qu’is attin-nent por d’aller jouquer dins chés ierres, obin chés grinds abes qu’élle nut alle vienche. Dins chés camps, chés pertrix ésses sont rassian-nées pa companies, jon-nes pis vielles insian-ne. Chés courts-jours éne sont pos téres aveuc eusses eutes, s’récauffer, s’norrir, és défin-ne : l’érgroupemint i fat la forche ! En vot itou dés ribimbelles éd vannieux dins chés camps. Vos m’direz i n’a dés éspèches qui font cha tut l’énée, chés courbeux, chés aron-nes qu’is s’grouptent dins chés vaqueries, bâtimints obin alintour éd chés ferniêtes. Éne parlons pos éd chés grisards qui sont dévnus autaint osieux éd tierre qu’éd mér. Et pis, en va vire dés propes-volontiaires : éch rouche-djeule, élle brunette troaîn-ne-buchon, chés mazingues bleuses o carbon-nières ch’est core souvint éch coupe qui cache chés bibittes dins chés viux abes. Profitons-in por pinsier à cmincher à yeu matte à minger : dés groains, d’élle graisse, dés fruts qui sont taqués et pis éd ieu quinte i cminchera à géler. Déméfions-nus équ chés mimites is n’lés maqutent pos, in mettant élle mingeoére pis ch’l'abruvo in heuteur. Vos airez itou dés pinchons (dés fos cheutes dés Arden-nes), dés verdières qui véront mier ein-ne bouquie. Et pis à ch’preume-timps pététe qu’i né n’a qu’is vont restier dins vos gardin et por vus récompinsier, is canteront au matin, à midi, pis au nut !

GLOSSAIRE
bain-ne : bande
jon-nieux : juvéniles
guernons : moustaches
quéche : tombe
torniquer : tournoyer
jouquer : percher
étornieux : étourneaux
ierre : lierre
tére : tendre, doux
vaquerie : étable
grisard : goéland
prope-volontiaire : individualiste
rouge-djeule : rouge-gorge
brunette troaîn-ne buchon : accenteur mouchet
bibittes : insectes
mimite : chat
mier : manger

[top]
About the Author


Leave a Reply

Spam Protection by WP-SpamFree